आज आम निर्वाचन-२०७९ : मतदान हुँदै

बाेलीखबर   ४ मंसिर २०७९, आईतवार ०६:३६

काठमाडौं । आगामी ५ वर्षका लागि प्रतिनिधिसभा र प्रदेशसभा सदस्य चयनका लागि आज मतदान हुँदैछ ।
प्रतिनिधिसभा र प्रदेशसभाका प्रतिनिधि छनाैटकाे याे चुनावअन्तर्गत बिहान ७ देखि साँझ ५ बजेसम्म मतदान समय ताेकिएकाे छ । जसका लागि मुलुकभरका १० हजार ८९२ मतदान स्थलका २२ हजार २२७ मतदान केन्द्र र १४१ अस्थायी मतदानस्थल छ ।

जम्मा १ करोड ७९ लाख ८८ हजार ५७० मतदाता  छन् । जसमा ९१ लाख ४० हजार ८०६, ८८ लाख ४७ हजार ५७९ महिला मतदाता रहेका छन् । १८५ अन्य मतदाता छन् भने ४ लाख ५० हजार अस्थायी मतदाता छन् ।

प्रतिनिधि सभाको प्रत्यक्षतर्फ १६५ वटा निर्वाचन क्षेत्रका लागि ६१ राजनीतिक दल र स्वतन्त्रबाट २ हजार ४१२ जना उम्मेदवार मैदानमा छन् । जसमा २ हजार १८७ जना पुरुष रहेका छन् भने २२५ जना महिला छन् । १ हजार ५४५ जना दलका र ८६७ जना स्वतन्त्र उम्मेद्वार छन् ।

समानुपातिकतर्फ ११० सिटका लागि ४७ राजनीतिक दलबाट २ हजार १९९ जनाको नाम बन्दसूचीमा छ ।

यस्तै प्रदेशसभाको प्रत्यक्षतर्फ ३३० वटा निर्वाचन क्षेत्रका लागि विभिन्न राजनीतिक दल र स्वतन्त्रबाट गरेर ३ हजार २२४ जना उम्मेदवार चुनावी मैदानमा छन् । जसमा २ हजार ९४३ पुरुष रहेका छन् भने १ हजार १८७ महिला रहेका छन् । जसमध्ये विभिन्न राजनीतिक दलबाट २ हजार १३० जना उम्मेदवार रहेका छन् भने १ हजार ९४ स्वतन्त्रबाट उम्मेदवार रहेका छन् ।

प्रदेश सभाको समानुपातिकतर्फ २२० सिटका लागि विभिन्न राजनीतिक दलबाट ३ हजार ७०८ जनाको नाम बन्दसूचीमा पेश भएको छ ।

चुनाव सुरक्षार्थ ७४ हजार ८४९ नेपाली सेना, ७१ हजार ६९३ नेपाली प्रहरी, ३५ हजार ११६ सशस्त्र प्रहरी बल, १ हजार ८२१ जना राष्ट्रिय अनुसन्धान विभागबाट र १ लाख १५ हजार म्यादी प्रहरी परिचालन गरिएको छ ।