बोलीखबर
२४ बैशाख २०८०, आईतवार १४:४५
पाल्पा । निस्दी गाउँपालिका पाल्पामा अन्तर पालिका स्तरीय पुरुष भलिबल प्रतियोगिता शनिबार देखि ढुङ्गनावेशीमा सुरू भएको छ । निस्दी गाउँपालिका वडा नम्बर-५,गल्धाको खेल मैदानमा सन्चालन भएको प्रतियोगिताको लुम्बिनी प्रदेश सभा सदस्य राजु प्रसाद श्रेष्ठले एक कार्यक्रम बिच उद्घाटन गरेकाे हाे ।
कार्यक्रमका प्रमुख अतिथि समेत रहेका प्रदेश सदस्य श्रेष्ठले पछिल्लो समय खेलकुदको बिकासले महत्त्व पाएको बताउदै खेलले खेलाडीहरुलाई अनुशासित समेत बनाउने बताएका थिए । कार्यक्रममा गाउँपालिका उपाध्यक्ष तिरन कुमारी श्रेष्ठले अहिले खेल मार्फत आफुलाई परिचित र व्यवसायी बनाउन सहयोग पुगेको बताए । निस्दी गाउँपालिकाका प्रमुख प्रशासकीय अधिकृत ध्रुव दयालले खेलकुदलाई पर्यटन बिकाससंग जोड्नु पर्ने बताउदै निस्दीको सकारात्मक पक्षलाई प्रचारप्रसार गर्नु सबैको जिम्मेवारी रहेकोमा जोड दिएका थिए ।
प्रतियोगिताको पहिलो दिन आयोजक निस्दी गाउँपालिका माथि रामपुर नगरपालिकाले पहिलो जीत हासिल गरेको छ । निकै प्रतिस्पर्धात्मक खेलमा रामपुर नगरपालिकाले जीत आफ्नो पक्षमा पारेको हो । पाल्पा जिल्लाका ७ वटा पालिका र बाहिरी जिल्लाका ५ पालिकाहरुको सहभागिता रहने प्रतियोगिताका बाँकी खेलहरु भोलि बिहान ८ बजे देखि सन्चालन हुने खेल संयोजक उमेश गाहाले बताएका छन् ।
वडा नम्बर-५,का वडाध्यक्ष दुर्गा बहादुर सोमैको अध्यक्षता भएको कार्यक्रमको सन्चालन होम राई मगरले गरेकाे थियाे ।
सम्बन्धित खवर
-
-
