२०८२-०७-२०
पाल्पा, तिनाउ गाउँपालिका–४ (सत्यवती ताल) —
पाल्पाको धार्मिक तथा सांस्कृतिक गौरवका रूपमा चिनिने सत्यवती बज्यै मन्दिर र सत्यवती तालमा यस वर्ष पनि कार्तिक शुक्ल पूर्णिमाको अवसरमा भव्य मेला लागेको छ।
देशका विभिन्न स्थानबाट आएका हजारौँ भक्तजनले आफ्नो मनोकामना पूरा होस् भनी देवीको आराधना गरेका छन्।
अनौठो परम्परा : “बज्यै बहिरी हुन्” भन्ने विश्वास
स्थानीय जनविश्वासअनुसार, सत्यवती बज्यै देवी कानले सुन्न नसक्ने (बहिरी) भएकाले भक्तजनले यहाँ चिच्याएर वर माग्ने प्रथा अनुसरण गर्छन्।
विश्वास गरिन्छ जो सत्य मनले आफ्नो कुरा देवीलाई सुनाउँछ, उसको मनोकामना अवश्य पूरा हुन्छ। भक्तजनले ताल वरिपरि तीन पटक प्रदक्षिणा गर्दै जल चढाउने र वर माग्ने परम्परा पनि यहाँ प्रचलित छ।
करिब १,५०० मिटर उचाइमा अवस्थित सत्यवती ताल चुरे क्षेत्रको हरियालीले घेरिएको पवित्र स्थल हो। ताल वरिपरिका वनजंगल, पक्षी र हरियाली वातावरणले यसलाई धार्मिक मात्र नभई प्राकृतिक पर्यटनको गन्तव्यका रूपमा पनि परिचित बनाएको छ।
स्थानीय बासिन्दा भन्छन “यो ठाउँ हाम्रो आस्था र पहिचानको केन्द्र हो। वर्षौंदेखि यसले गाउँको एकता र परम्परा जोगाइरहेको छ।“सत्यवती ताल केवल धार्मिक स्थल होइन, यो हाम्रो संस्कृति र आस्थाको प्रतिक हो। यस क्षेत्रलाई धार्मिक पर्यटनका रूपमा विकास गर्न प्रतिबद्ध छौ।”
त्यसैगरी तिनाउ गाउँपालिका अध्यक्ष प्रेम श्रेष्ठले मेलाको व्यवस्थापन र संरक्षणबारेमा बोल्दै“मेलामा आउने भक्तजनको सहजता सुनिश्चित गर्न गाउँपालिकाले यातायात, पानी, सरसफाइ र स्वास्थ्य सेवाको व्यवस्था गरेको छ।
हामी यो क्षेत्रलाई स्थायी रूपमा धार्मिक र पर्यटन विकासको केन्द्र बनाउन योजनाबद्ध रूपमा अघि बढिरहेका छौं।”भन्नू भएको छ ।
मेला व्यवस्थापनमा स्थानीय सक्रियता,मेलाको सुरक्षाका लागि प्रहरी, स्थानीय युवा क्लब र स्वयंसेवकहरू खटिएका छन्। ताल वरिपरिका बाटोहरू मर्मत गरिएको छ भने फोहर व्यवस्थापन र पानी आपूर्तिका लागि अस्थायी ट्याङ्की पनि जडान गरिएको छ। स्थानीय व्यवसायीले मेलाबाट राम्रो आम्दानी हुने आशा व्यक्त गरेका छन्।
प्रत्येक वर्ष कार्तिक पूर्णिमामा हजारौँ भक्तजनका आवाजले गुञ्जिने यो पवित्र ताल क्षेत्र आज पनि नेपाली आस्थाको अमर प्रतीकका रूपमा उभिएको छ।सत्यवती बज्यै मेला केवल एक धार्मिक कार्यक्रम होइन यो विश्वास, संस्कृति र समुदायबीचको एकताको प्रतीक बनेको छ।अबका दिनमा धर्मिक मेलालाई आर्थिक सङ्ग जोड्न सके समृद्धिको ढोका धार्मिक पर्यटन सङ्ग जोडिने छ । संगै बाटोको स्तर उन्नती गर्दै अझ व्यबस्थित गर्न जरुरी रहेको देखिन्छ ।
