२६ आश्विन २०७७, सोमबार २१:०५
२६ असोज, रामपुर । पाल्पाको निस्दी गाउँपालिकाका जनप्रतिनिधि तथा कर्मचारीमा कोरोना भाइरस संक्रमण पुष्टि भएपछि गाउँपालिकाको अत्यावश्यक बाहेकका सेवा बन्द गरिएको छ ।
गाउँपालिकाका अध्यक्ष, प्रमुख प्रशासकीय अधिकृत र कर्मचारीमा संक्रमण पुष्टि भएलगत्तै यही असोज २३ गते राति १२ बजेदेखि अगामी कात्तिक १ गते राति १२ बजेसम्मका लागि गाउँपालिका सिल पनि गरिएको हो ।
गाउँपालिकाले ५० जनाको स्वाब संकलन गरी पाल्पा अस्पतालमा सञ्चालन गरिएको कोभिड–१९ प्रयोगशालामा पठाइएको थियो । तीमध्ये १० जनाको रिपोर्ट पोजेटिभ आएको हो । कोरोना संक्रमित सबैको स्वास्थ्य अवस्था सामान्य छ ।
रामपुर नगरपालिकामा आवतजावत बन्द
यसैगरी रामपुरमा कोरोना संक्रमण देखिएपछि एक हप्तासम्मका लागि नगरपालिका सिल गरिने भएको छ । रामपुर अस्पतालमा कार्यरत २८ स्वास्थ्यकर्मीमा कोरोना पुष्टि भएपछि आज राति १२ बजेदेखि यही असोज ३० गते राति १२ बजेसम्मका लागि नगरपालिकामा आवतजावत, व्यापार, व्यवसाय, उद्योग कलकारखाना, सवारी साधन सञ्चालनमा रोक लगाइने नगरप्रमुख रमणबहादुर थापाले जानकारी दिए।
यसैगरी स्वास्थ्यकर्मीमा कोरोना संक्रमण देखिएपछि रामपुर अस्पतालले आकस्मिकबाहेकका अन्य सेवा बन्द गरेको छ । शुक्रबार अस्पतालमा कार्यरत २८ जना स्वास्थ्यकर्मीको कोरोना रिपोर्ट पोजेटिभ आएपछि अर्को सूचना जारी नगर्दासम्मका लागि अतिआवश्यकबाहेकका बन्द गरिएको अस्पतालका मेडिकल सुपरिटेण्डेण्ट डा. विजय परियारले बताए ।
पूर्वखोला अलर्ट
त्यस्तै पूर्वखोला गाउँ पालिकाले रामपुर नगरपालिका र निस्दी गाउँपालिकामा समुदाय स्तरमा बढ्दो कोराना भाइरस संक्रमण फैलिएको आशंकामा उच्च सतर्कत अपनाएको छ । कोरोना भाइरस फैलिन सक्ने भन्दै अतिआवश्यक काममा आवत जावत गर्दा नेपाल सरकारले तोकेको स्वास्थ्य मापडण्ड अपनाउन जारी सूचनामा भनिएको छ ।
सम्बन्धित खवर
-
-
