अर्थ मन्त्री बिष्णु पौडेल शनिबार बिहान बुटवल आउने

रामपुर, नेपाल सरकारका अर्थ, तथा गृह मन्त्री बिष्णु पौडेल शनिबार बिहान बुटवल आउने भएका छन् । कालिगण्डकी तिनाउ बहुउद्देश्यीय डाइभर्सन बहुउद्देश्यीय आयोजनाको कार्यालयको उद्घाटन गर्न पौडेल रूपन्देही आउन लागेका हुन् ।

शुक्रबार मात्रै गृह, उद्योग वाणिज्य तथा आपूर्ति उर्जा जलश्रोत तथा सिंचाई मन्त्रालयको जिम्मेवारी पाएका पौडेल पाएका छन् । पौडेलले विगत एक दशभन्दा बढी समयदेखि उठाउँदै आएको डाइभर्सनको कार्यालय बुटवल कालिकानगरमा उद्घाटन गर्नेछन् । कार्यालय प्रमुख सुन्तोष कैनीले कार्यालय स्थापनासँगै अब आयोजनाको डिपिआर तयारीमा लागिने बताए । ‘शनिबार अर्थमन्त्री ज्यूले कार्यालय उद्घाटन गर्दै हुनुहुन्छ,’ कैनीले लोकान्तरसँग भने, ‘साउनपछि आयोजनाको काम तीब्र रूपमा अगाडि बढ्ने छ ।’

आर्थिक वर्ष २०७८/७९ को बजेटमा पनि बजेट समावेश गरी आयोजना अगाडि बढाइने उल्लेख गरिएको छ । पौडेलले निरन्तर रुपमा कालीगण्डकी नदीलाई डाइभर्सन गरेर तिनाउ नदीमा मिसाई रुपन्देही कपिलवस्तु र नवलपरासीको खेतीयोग्य जमिन सिंचाई गर्ने बताउँदै आएका छन् । कार्यालयको उद्घाटनपछि सुख्खानगर स्थित पुष्पलाल भवनमा रहेको पार्टी कार्यालयमा पार्टी कार्यकर्ताहरूसँग भेटघाट गर्ने कार्यक्रम पनि रहेको छ ।