चौथो इस्लामपुर कप खुला क्रिकेट प्रतियोगिता शुरु

पाल्पा – ईस्लामिक सक्रिय युवा समाजको आयोजनामा पाल्पाको रामपुरमा चौथो इस्लामपुर कप खुला क्रिकेट प्रतियोगिता शुरु भएको छ । रामतुलसी माविको खेल मैदान बेझाडमा शुरुभएको प्रतियोगिताको रामपुर नगरपालिकाका नगर प्रमुख रमण बहादुर थापाले शुभारम्भ गर्नुभयो ।

बल रेफ्रीलाई हस्तान्तरण तथा व्याटिङ्ग गरेर खेलको शुभारम्भ गर्दै नगरप्रमुख थापाले स्थानिय खेलाडीको प्रबर्द्धनमा समाजले खेलको आयोजना गर्नु महत्वपूर्ण काम भएको बताउनुभयो । ईस्लामिक सक्रिय युवा समाजले खेल क्षेत्र मात्र होइन, कोभिडको समयमा राहतदेखि स्वास्थ्य सस्था, बिपन्न समुदायमा सहयोग लगायत सामाजिक कार्यमा पुर्‍याएको योगदानको चर्चा गर्नुभयो ।प्रतियोगितामा पाल्पा, स्याङ्जा, तनहुँ, नवलपरासी, कास्की, रुपन्देही, अर्घाखाँची र गुल्मी जिल्लाका गरि १५ समुहको सहभागीता रहेको खेल प्रचार-प्रसार समितिका संयोजक रहिम मियाँले जानकारी दिनुभयो ।

ईस्लामिक सक्रिय युवा समाजका अध्यक्ष ल्याकत अलिले क्लवले विगत देखि प्रतियोगिता सञ्चालन गर्दै आएकोमा यस बर्ष प्रतियोगितालाई थप परिस्कृत गरेर लैजान लागेको बताउनुभयो । समाजमा युवालाई उत्साह बढाउन र एकबद्द गराउन यस्ता कार्यक्रम गरेको उल्लेख गर्दै अलिले खेलाडीको पहिचान र मैदानका लागि खेल आयोजना गर्नु टट्कारो रहेको बताउनुभयो । समाजका अध्यक्ष अलिको अध्यक्षतामा भएको खेल शुभारम्भ कार्यक्रमको सञ्चालन समाजका सचिव अमिन शेखको गर्नुभएको हो । प्रतियोगिता शुभारम्भ लगत्तै भएको उट्घाटन खेलमा रामपुर नगरपालिका ३ रजघरा र चापाकोट क्रिकेट क्लव भिडेका थिए ।

खेलमा रजघरालाई चापाकोटले १ सय ५० रनको फराकिलो अंकले पराजित गरेको छ । टस जिटेर व्याटिङ्ग रोजेको चापाकोटले निर्धारित १५ ओभरको खेलमा ५ विकेटको क्षतिमा २ सय रन बनाएको थियो । २ सय १ रनको लक्ष्य पछ्याएको रजघरा ९ ओभरमा ४९ रन बनाउदै अलआउट भएको थियो ।प्रतियोगिता अन्तर्गत शुक्रबार २ वटा खेल हुँदैछ । प्रतियोगिताका विजेताले नगद १ लाख राशी र फस्ट रनअपले नगद ५० हजार सहित ट्रफी, मेडल र प्रमाण पत्र प्राप्त गर्नेछन् ।