रामपुर नगरपालिकाकाे एघाराैं नगर सभा सम्पन्न, शिक्षा, स्वास्थ्य, कृषि र पर्यटनमा जाेड

पाल्पा। रामपुर नगरपालिका एघाराैं नगर सभा सम्पन्न गरेकाे छ। शुक्रबार सम्पन्न नगरसभामा रामपुर नगरपालिकाका नगर प्रमुख रमण बहादुर थापाले आगामी आर्थिक वर्षको नीति तथा कार्यक्रम  प्रस्तुत गरेका थिए ।

नगर सभाले शिक्षा, पूर्वाधार विकास संगै, स्वास्थ्य, कृषि र पर्यटनका कार्यक्रमलाई प्राथमिकतामा राखेको छ । नीति तथा कार्यक्रमले नयाँ योजना संगै पुराना योजनालाई पनि निरन्तरता दिएको छ । नगर सभामा प्रस्तुत नीति तथा कार्यक्रम संशोधन सहित सर्वसम्मत रुपमा पारित भएको छ ।

सभाले युवा स्वरोजगार कार्यक्रमलाई थप प्रोत्साहन गर्न व्याज अनुदान २० लाख बाट बढाएर ३० लाख पुर्याउने नीति लिएकोछ ३० जना भन्दा बढीलाई रोजगार दिने उद्योग तथा व्यवसायलाई ३० लाख सम्म व्याज अनुदान दिने, १० करोड भन्दा बढी लगानी गर्ने रोजगार दातालाई ५० प्रतिशत विद्युत महशुल छुट र वर्ष सम्म स्थानीय कर छुट दिने, वैदेशिक रोजगारीमा जाने युवाहरुको अभिलेख राखी आवश्यक तालिमको व्यवस्था गर्ने, म सफा गर्छु मेरो नगर कार्यक्रम सञ्चालन गर्ने नगर प्रमुख थापाले बताएका छन् ।

सभाले सूचना प्रविधिको उच्चतम उपयोग गर्दै सार्वजनिक सेवालाई सहज बनाउन अनलाईन र विद्युतिय सेवालाई प्रभावकारी बनाउने, नगरले खानेपानीको व्यवस्था गर्न लिफ्टिङ्गका योजनाहरु सञ्चालन गर्ने, दुग्ध जन्य, मासु जन्य वा अन्य व्यवसायिक कृषि उत्पादन गर्ने कृषकलाई उत्पादनको आधारमा अनुदान दिईनेछ ।

सभाले आर्थिक वर्षको लागि ७२ करोड ४७ लाख विनियोजन गरेको छ । नगर सभामा आर्थिक वर्ष २०७९/०८० को विनियोजन विद्येयक र आर्थिक विद्येयक प्रस्तुत गर्दै उपप्रमुख बालकुमारी थापाले बजेट सार्वजनिक गरेकाे हाे ।

चालू खर्च, पुँजिगत खर्च र वित्तिय व्यवस्था सहितको रकम सहित नगरपालिकाले संघ तर्फ ६० करोड ४४ लाख ६४ हजार, प्रदेश तर्फ ६ करोड ३ लाख ३१ हजार र आन्तरिक स्रोत बाट ६ करोड आम्दानी गर्ने लक्ष्य लिएको छ । जस मध्ये खर्च तर्फ वडा गत बजेट ५ करोड २० लाख, सशर्त कार्यक्रम ३५ करोड ४४ लाख, क्षेत्र गत कार्यक्रमको लागि ३१ करोड ८३ लाख ९५ हजार विनियोजित गरेको छ ।

क्षेत्र गत कार्यक्रम मध्ये अर्थिक विकासको लागि ४ करोड ४५ लाख ७५ हजार ३ सय, सामाजिक विकासको लागि ७ करोड ३२ लाख ३० हजार ८ सय ५०, पूर्वाधार विकास तर्फ ११ करोड १४ लाख, ३८ हजार २ सय ५०, विपद व्यवस्थापन तर्फ ९५ लाख ५१ हजार ८ सय ५० र सुशासन तथा प्रशासनिक तर्फ ७ करोड ९५ लाख ९८ हजार ७ सय ५० विनियोजन गरेको छ ।